Вальфовіч расказаў аб ключавых задачах праверкі баявой гатоўнасці Узброеных Сіл

27 сакавіка, Гродзенскі раён /Кар. БЕЛТА/. Дзяржаўны сакратар Савета бяспекі Беларусі Аляксандр Вальфовіч расказаў журналістам аб ключавых задачах праверкі баявой гатоўнасці Узброеных Сіл, перадае карэспандэнт БЕЛТА.

"Згодна з планам Дзяржаўнага сакратарыята Савета бяспекі праводзіцца раптоўная праверка шэрага злучэнняў воінскіх часцей Узброеных Сіл у адпаведнасці з распараджэннем Прэзідэнта. Правераны ўжо дзеянні дзяжурных падраздзяленняў, рот пастаяннай гатоўнасці механізаваных брыгад. Роты з задачамі справіліся і паказалі добрыя навыкі пры ўзбраенні і выкананні сваіх задач у адпаведнасці з прызначэннем. Гэта было праверана на мінулым тыдні", - сказаў Аляксандр Вальфовіч.

На гэтым тыдні пачаўся асноўны этап праверкі ў цэлым воінскіх часцей механізаваных брыгад пастаяннай гатоўнасці. "Створана батальённая тактычная група непасрэдна механізаванай брыгады Заходняга аператыўнага камандавання, якая была прыведзена ў названыя тэрміны ў баявую гатоўнасць. Тэхніка прыведзена ў баявы стан, праверана загрузка боекамплекта, боепрыпасаў. Батальён зрабіў марш у раён палігона, дзе атрымаў задачу адбіць раптоўны пераход дзяржаўнай граніцы праціўнікам, нанесці яму агнявое паражэнне і ажыццявіць праследаванне, знішчэнне і выхад на рубеж дзяржаўнай граніцы. Асабовы склад дзейнічае ўпэўнена", - сказаў Аляксандр Вальфовіч.

Як падкрэсліў дзяржаўны сакратар Савета бяспекі Беларусі, увага звяртаецца перш за ўсё на абучанасць афіцэрскага складу, асабовага складу падраздзяленняў: "Менавіта на адпрацоўку ўменняў і навыкаў пры дзеяннях у сучасных умовах, адпрацоўку новых форм і спосабаў вядзення баявых дзеянняў з улікам вопыту вядзення спецыяльнай ваеннай аперацыі ва Украіне. Глядзім, наколькі аснашчаны падраздзяленні беспілотнымі лятальнымі сродкамі, як асабовы склад умее іх прымяняць па праціўніку і як умее абараняцца ад прымянення беспілотных лятальных сродкаў".

"Сёння створаны пэўныя падраздзяленні ў кожным механізаваным батальёне менавіта па процідзеянні і па прымяненні беспілотных лятальных сродкаў. На ўзбраенні знаходзяцца розныя тыпы квадракоптараў: разведвальных, ударных беспілотных лятальных апаратаў. Таму глядзім, як асабовы склад дзейнічае, наколькі ён абучаны гэтаму", - дадаў Аляксандр Вальфовіч.

Сёння праходзіць заключны этап праверкі. "Будуць правераны ўжо агнявыя навыкі, г.зн. непасрэдна пытанні агнявога паражэння і выкананне практычных задач ужо асабовым складам, - сказаў Аляксандр Вальфовіч. - Думаю, што асабовы склад з задачамі справіцца. Пакуль усё ў іх атрымліваецца. Увогуле, асабовы склад гатовы да выканання задач па прызначэнні".-0-