"Трэба працаваць дзень і ноч". Лукашэнка патрабуе ад аграрыяў своечасова завяршыць асеннія палявыя работы

16 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе ад аграрыяў своечасовага завяршэння асенніх палявых работ. Аб гэтым кіраўнік дзяржавы заявіў 16 кастрычніка на нарадзе аб праектах прагнозных дакументаў на 2026 год, перадае карэспандэнт БЕЛТА.

Прэзідэнт акцэнтаваў увагу ўдзельнікаў мерапрыемства на актуальных пытаннях у сельскай гаспадарцы - адной з найважнейшых галін эканомікі.

Аляксандр Лукашэнка падкрэсліў важнасць своечасовага выканання неабходных асенніх палявых работ, уключаючы ў тым ліку ўборку ўраджаю, узворванне і ўзняцце зябліва, унясенне ўгнаенняў, падрыхтоўку глебы да наступнага сезона.

"Маразы вось-вось прыйдуць. Калі не ўзнімем зябліва, не перааром, у нас будзе такая запарка вясной, што мы не пра ўраджай будзем гаварыць... Таму сёння трэба дзень і ноч працаваць", - падкрэсліў кіраўнік дзяржавы.

Прэзідэнт у час нарады прадметна і дэталёва распытаў пра ход уборачнай кампаніі ў розных рэгіёнах. Асобную ўвагу ён звярнуў на сітуацыю ў Гродзенскай вобласці, якая традыцыйна займае моцныя пазіцыі па многіх паказчыках у АПК. Але ў гэтым годзе яшчэ не завяршыла ўборку па асобных культурах, што, у прынцыпе, не характэрна для гэтага рэгіёна. Старшыні Гродзенскага аблвыканкама Юрыю Караеву давялося адказваць на шэраг крытычных пытанняў і заўваг кіраўніка дзяржавы, у тым ліку наконт яшчэ не завершанай уборкі буракоў і кукурузы. Апошняя яшчэ застаецца на палях у асобных рэгіёнах, і якасць зерня паступова страчваецца. Яго трэба як мага хутчэй збіраць і, напрыклад, нарыхтоўваць у плюшчаным выглядзе. Так яно добра захоўваецца і падыходзіць для жывёлагадоўлі - кармлення жывёлы. Тым больш што абсталявання, машын для плюшчэння зерня і нарыхтоўкі такога корму ў краіне дастаткова.

Добрыя вынікі работы Прэзідэнт адзначыў у Мінскай вобласці: "Мінская вобласць у гэтым годзе працуе нядрэнна, хоць цяжкая вобласць". А кіраўніцтва Гомельскай і Віцебскай абласцей Аляксандр Лукашэнка папярэдзіў, што стан спраў у сельскай гаспадарцы будзе прынцыпова вывучаны, асабліва ў частцы таго, што зроблена для выпраўлення сітуацыі з падзяжом жывёлы.-0-