Развіццё малочнай галіны і выхад на новыя рынкі абмеркавалі на выязным семінары Мінсельгасхарча

Мінсельгасхарч правёў выязны семінар-нараду аб развіцці малочнай галіны на базе Гродзенскай вобласці, паведамілі БЕЛТА ў прэс-службе міністэрства.

На сустрэчы абмеркавалі пашырэнне вытворчасці запатрабаванай малочнай прадукцыі, уключаючы дзіцячае харчаванне. У мерапрыемстве прынялі ўдзел кіраўнікі галоўных упраўленняў аграрнага ведамства, вядучых навуковых устаноў, буйнейшых малакаперапрацоўчых прадпрыемстваў краіны і профільныя спецыялісты.

Удзельнікі азнаёміліся з вытворчымі магутнасцямі ТАА "Праймілк" - прадпрыемства, арыентаванага на экспарт у Афрыку, і ААТ "Беллакт", дзе запушчаны інавацыйныя лініі па выпуску дзіцячага харчавання ў сучасных упаковачных фарматах. Былі прадстаўлены тэхналогіі фасоўкі сухіх малочных прадуктаў у газавым асяроддзі, якія дазваляюць захоўваць якасць прадукцыі пры далёкіх пастаўках.

Намеснік міністра сельскай гаспадаркі і харчавання Аляксандр Якоўчыц прадставіў ключавыя напрамкі Стратэгіі развіцця малакаперапрацоўчай галіны на 2026-2035 гады, падвёў вынікі работы ў 2025 годзе. "Атрымана 9 млн 46,3 тыс. т малака ў сельгасарганізацыях - плюс 5,3 працэнта да 2024 года, таварнасць дасягнула 91,8 працэнта - вышэй на 0,3 працэнтнага пункта", - адзначыў ён.

Намеснік начальніка ўпраўлення мясной і малочнай прамысловасці Мінсельгасхарча Наталля Гушча прадставіла аналіз малочнага рынку Кітая і абазначыла перспектыўныя нішы для беларускай прадукцыі: ад спецыялізаваных сумесей да функцыянальных інгрэдыентаў.

Удзельнікі семінара абмеркавалі навукова-вытворчае суправаджэнне: распрацоўку тэхналогій атрымання лактаферыну, які з'яўляецца каштоўным кампанентам дзіцячага харчавання, павышэнне хуткарастваральнасці сухіх малочных прадуктаў, асваенне рэцэптур з павышанай тлушчавай фракцыяй, якія адпавядаюць запытам прэміяльных сегментаў. Кіраўнікі прадпрыемстваў падзяліліся практычнымі кейсамі выхаду на новыя рынкі, уключаючы адаптацыю асартыменту пад патрабаванні краін Азіі і Блізкага Усходу.

Міністр сельскай гаспадаркі і харчавання Юрый Горлаў падкрэсліў, што важна дакладна адказаць на два пытанні: што вырабляць і куды прадаваць, зыходзячы са штогадовага прыросту малака. "Гэта магчыма толькі праз глыбокую перапрацоўку і выпуск інавацыйнай прадукцыі, запатрабаванай на сусветным рынку. Сённяшняе мерапрыемства дало магчымасць убачыць дасягненні галіны і выпрацаваць канкрэтныя рашэнні. І я ўпэўнены: рэалізаваць іх мы можам у цесным партнёрстве з навукай і прыкладаючы намаганні па дыверсіфікацыі экспартных напрамкаў", - падкрэсліў міністр.-0-