Саўмін прыняў меры па рэалізацыі ўказа Прэзідэнта аб аўтамабільных перавозках пасажыраў

9 жніўня, Мінск /Кар. БЕЛТА/. Пастановай Савета Міністраў ад 1 жніўня нумар 565 прыняты меры па рэалізацыі ўказа кіраўніка дзяржавы ад 25 студзеня нумар 32 "Аб аўтамабільных перавозках пасажыраў". Дакументам, у прыватнасці, зацверджана палажэнне аб дзяржаўным інфармацыйным рэсурсе "Рэестр аўтамабільных перавозак пасажыраў у нерэгулярных зносінах", паведамляе БЕЛТА са спасылкай на Нацыянальны прававы інтэрнэт-партал.

Палажэннем урэгуляваны пытанні фарміравання і вядзення названага рэестра, прыпынення, аднаўлення знаходжання ў рэестры звестак і выключэння з рэестра звестак, пацвярджэння ўстаранення падстаў, што прывялі да прыпынення знаходжання ў рэестры звестак, і прадастаўлення інфармацыі, якая змешчана ў рэестры.

Пад дзеянне палажэння не падпадаюць міжнародныя аўтамабільныя перавозкі пасажыраў, аўтамабільныя перавозкі пасажыраў у рэгулярных перавозках і аўтамабільныя перавозкі пасажыраў, выключаныя са сферы дзеяння закона "Аб аўтамабільным транспарце і аўтамабільных перавозках".

Паўнамоцтвы па фарміраванні і вядзенні рэестра, эксплуатацыі і праграмна-тэхнічным суправаджэнні рэестра, у тым ліку шляхам прыцягнення іншых арганізацый, размяшчэнні рэестра з выкарыстаннем рэсурсу рэспубліканскага цэнтра апрацоўкі даных у інтэрнэце ўскладзены на Транспартную інспекцыю Міністэрства транспарту і камунікацый. Згодна з палажэннем, для кожнага зацікаўленага ў рэестры ствараецца асабісты кабінет карыстальніка, уваход у які магчымы з выкарыстаннем асабістага ключа электроннага лічбавага подпісу. Сертыфікат адпаведнага адкрытага ключа выдаецца рэспубліканскім засведчвальным цэнтрам Дзяржаўнай сістэмы кіравання адкрытымі ключамі праверкі электроннага лічбавага подпісу.

Таксама пастановай нумар 565 зацверджана палажэнне аб парадку прадастаўлення аўтамабільным перавозчыкам, дыспетчарам аўтамабільных перавозак пасажыраў у нерэгулярных перавозках, дыспетчарам таксі доступу да інфармацыйных сістэм і рэсурсаў, якія яны выкарыстоўваюць у сваёй дзейнасці, вызначана форма ўліку заказаў (выкананых і нявыкананых), у тым ліку атрыманых з выкарыстаннем інфармацыйных сістэм і рэсурсаў. Акрамя таго, дакументам прадугледжана карэкціроўка шэрага нарматыўных прававых актаў. Змяненні ўнесены ў тым ліку ў правілы аўтамабільных перавозак пасажыраў.

Як паведамілі ў Мінтрансе, у правілах аўтамабільных перавозак пасажыраў удакладняюцца патрабаванні да інфармацыі, змешчанай у электронным выглядзе пры перавозках аўтамабілямі-таксі, і ўстанаўліваецца парадак відэафіксацыі выканання перавозак пасажыраў, а таксама захоўвання і перадачы даных. Так, размяшчэнне тэхнічнага сродку відэафіксацыі павінна забяспечваць максімальны вугал агляду, уключаючы агляд месцаў размяшчэння вадзіцеля і пасажыраў, якасць запісу павінна адпавядаць узроўню, дастатковаму для адназначнай ацэнкі падзей, што адбываюцца перад транспартным сродкам і ў салоне транспартнага сродку, з прывязкай да даты і часу іх фіксацыі.

У змененых правілах аўтамабільных перавозак пасажыраў таксама ўдакладняецца норма аб тым, што перавозчык абавязаны заключыць з вадзіцелем працоўны дагавор. Разам з тым, індывідуальнаму прадпрымальніку, які выконвае перавозкі пасажыраў аўтамабілямі-таксі, прадастаўляецца права не забяспечваць паміж зменамі захоўванне аўтамабіляў на ахоўных стаянках, а для перавозчыкаў, якія самастойна прымаюць і перадаюць заказы, і дыспетчараў устанаўліваецца абавязак па забеспячэнні не пазней за 10-е чысло месяца, што ідзе за справаздачным, уключэння ў рэестр поўных і дакладных звестак аб уліку заказаў (выкананых і нявыкананых), атрыманых (перададзеных).

Асобныя палажэнні пастановы ўступаюць у сілу пасля яе афіцыйнага апублікавання, астатнія - з 1 лістапада.-0-