Каранік на адкрыцці ангіяграфічнага комплексу ў Гродне: гэта падніме кардыядапамогу ў рэгіёне на новы ўзровень

7 сакавіка, Гродна /Кар. БЕЛТА/. Мадэрнізаваная рэнтгенаперацыйная з новым ангіяграфічным комплексам з інтэграванай сістэмай для радыёчастотнай абляцыі адкрылася ў Гродзенскім абласным клінічным кардыялагічным цэнтры. Ва ўрачыстай цырымоніі адкрыцця прыняў удзел намеснік прэм'ер-міністра Беларусі Уладзімір Каранік, перадае карэспандэнт БЕЛТА.

"Сёння ў прафесійнага і вельмі матываванага калектыву Гродзенскага абласнога кардыяцэнтра істотна пашыраюцца магчымасці ў аказанні дапамогі, спецыялісты ў поўнай меры змогуць праявіць свае вопыт, веды, навыкі, талент, - адзначыў Уладзімір Каранік. - Умацаванне матэрыяльнай базы такой важнай службы, як кардыялагічная, заўсёды было ў прыярытэце ў нашай дзяржавы і абласных органаў дзяржкіравання. Работа ішла пастаянна, яна не завершыцца і сённяшняй падзеяй. Таму што мы разумеем, што спецыялісты-кардыёлагі ў сваёй дзейнасці часта сутыкаюцца з сітуацыямі, калі лік ідзе на мінуты. Калі ад таго, як хутка і прафесіянальна будзе аказана дапамога, залежаць жыццё і здароўе чалавека".

Намеснік прэм'ер-міністра падкрэсліў, што новы комплекс дасць магчымасць аказваць дапамогу яшчэ больш аператыўна, яшчэ з меншай рызыкай для медыкаў і пацыентаў, і выказаў упэўненасць, што гэта дапаможа выратаваць тысячы жыццяў і захаваць здароўе тысячам людзей. Ён асабліва адзначыў, што гэта далёка не апошні крок ва ўмацаванні матэрыяльнай базы сістэмы аховы здароўя Гродзенскай вобласці ў цэлым і кардыяцэнтра ў прыватнасці.

"Перакананы: недалёкі той час, калі мы будзем адкрываць новы корпус неадкладнай дапамогі самай сучаснай кардыялагічнай службы рэспублікі, што падніме ўзровень аказання кардыядапамогі жыхарам Гродзеншчыны на яшчэ больш высокі ўзровень", - сказаў Уладзімір Каранік.

Гаворачы пра ўнікальнасць гэтага праекта, намеснік прэм'ер-міністра растлумачыў, што яна не толькі ў новых магчымасцях, якія атрымліваюць кардыяхірургі. Гэта паказчык таго, як можна сумеснымі намаганнямі дасягнуць эфектыўнага выніку.

"Міністэрства аховы здароўя набыло сучасны ангіяграфічны комплекс, будаўнікі рацыянальна выкарысталі памяшканне існуючай аперацыйнай, дзе абнавілі толькі тое, што неабходна. Медыкі ўжо ў працэсе падрыхтаваліся да работы на новым апараце, і літаральна ў будучы панядзелак змогуць пачаць на ім працаваць. Аперацыйная ўладкавана так, што абсталяванне анестэзіёлагаў знаходзіцца за яе межамі, спецыялісты ўваходзяць у зону іанізуючага апрамянення толькі па неабходнасці. Праграмнае забеспячэнне ангіёграфа дазваляе гродзенскім урачам асвоіць новы від дапамогі - радыёчастотную абляцыю пры парушэннях сардэчнага рытму, якія пагражаюць жыццю. З'явілася магчымасць дакладна вызначаць, на якім этапе праблема, і малаінвазіўным спосабам разбураць паталагічныя шляхі, якія парушаюць работу сэрца, тым самым вяртаючы пацыента да нармальных нагрузак без рызыкі для яго жыцця", - расказаў Уладзімір Каранік.

Сённяшняя падзея - яскравы паказчык таго, што здароўе людзей заўсёды было, ёсць і будзе ў цэнтры ўвагі нашай дзяржавы, а таксама таго, што сумесна вырашаючы задачы, мы атрымліваем эканамічна і клінічна эфектыўны вынік, адзначыў намеснік прэм'ер-міністра.

Аб тым, што медыцына ў Беларусі - гэта не бізнес, не зараблянне на здароўі людзей, нагадаў выконваючы абавязкі старшыні Гродзенскага аблвыканкама Юрый Караеў.

"Клопат аб гэтым узяла на сябе дзяржава, - сказаў ён. - У прыярытэце нашай медыцыны - эфектыўная, якасная і даступная дапамога людзям. Па медыцынскую дапамогу да нас едуць і грамадзяне іншых краін. У рэгіёне адкрываюцца новыя медустановы, узводзіцца сучасная бальніца ў Гродне, будуюцца паліклінікі ў Ваўкавыску і Астраўцы, абнаўляюцца ФАПы. Што датычыцца абласнога кардыяцэнтра, то ён становіцца ўзорам аказання высакаякаснай медыцынскай дапамогі па сваім профілі. Улічваючы, што кардыялагічныя хваробы займаюць адно з першых месцаў у структуры захваральнасці, гэта апраўданае ўкладанне сродкаў і сіл. Задача цяпер у тым, каб асвоіць новы апарат хутка і якасна для таго, каб дапамагаць людзям".

Як падкрэсліў Юрый Караеў, важна, што ўвод у строй новага ангіёграфа дасць магчымасць скараціць ліст чакання пацыентаў, пашырыць магчымасці высокатэхналагічнай дапамогі жыхарам у сваім рэгіёне.

Сімвалічную чырвоную стужачку ля ўвахода ў аперацыйную, дзе ўстаноўлены новы ангіяграфічны комплекс, перарэзалі Уладзімір Каранік, Юрый Караеў, намеснік міністра аховы здароўя Барыс Андрасюк, начальнік галоўнага ўпраўлення аховы здароўя аблвыканкама Людміла Кеда і галоўны ўрач абласнога клінічнага кардыяцэнтра Андрэй Янушка.

Як адзначылі ў кардыяцэнтры, устаноўка новага ангіёграфа адкрывае магчымасці для аказання інтэрвенцыйнай дапамогі пацыентам з тахіярытміямі, дасць магчымасць ажыццяўляць дакладны пошук крыніцы арытміі і ўстараняць яе. У рэгіёне з яго ўводам плануюць выконваць каля 120 працэдур радыёчастотнай абляцыі сэрца ў год. Новы ангіяграфічны комплекс таксама мае магчымасць  даследавання каранарных артэрый на наяўнасць стэназіруючага працэсу і выконваць пры неабходнасці празскурнае каранарнае ўмяшанне і стэнціраванне.-0-