Абласны конкурс юных музыкантаў "Вясёлка надзей" пройдзе ў Навагрудку

Юныя салісты і ансамблі з Гродзенскай і іншых абласцей Беларусі прымуць удзел у адкрытым абласным конкурсе "Вясёлка надзей", які адбудзецца ў Навагрудку. Аб гэтым паведамілі карэспандэнту БЕЛТА ва ўпраўленні культуры Гродзенскага аблвыканкама. "У інструментальнага конкурсу доўгая і цікавая гісторыя, - расказала дырэктар Навагрудскай дзіцячай школы мастацтваў Людміла Аніскіна. - З 2000 года на пляцоўцы Навагрудскай ДШМ штогод праходзіў адкрыты рэгіянальны фестываль "Вясёлка надзей". З кожным годам інтарэс да фестывалю ўзрастаў, колькасць удзельнікаў павялічвалася. У 2019-м фестываль атрымаў статус адкрытага абласнога конкурсу юных талентаў. Яго арганізатарамі сталі ўпраўленне культуры Гродзенскага аблвыканкама, аддзел культуры Навагрудскага райвыканкама і Навагрудская ДШМ". У конкурсе могуць прымаць удзел юныя таленавітыя выканаўцы на струнна-смычковых, духавых і клавішных інструментах, як класічных, так і народных, салісты і музычныя калектывы. Пры гэтым намінацыі штогод змяняюцца. "Задача фестывалю - выявіць і падтрымаць таленавітых вучняў, стымуляваць развіццё творчых здольнасцей і выканальніцкага майстэрства юных музыкантаў, - дадала Людміла Аніскіна. - Музычнае свята садзейнічае папулярызацыі беларускай народнай, класічнай, сучаснай культуры, павышэнню ўзроўню прафесійнага майстэрства педагогаў і выканаўцаў, абмену прафесійным вопытам. Перавагі ў рэпертуары аддаюцца творам беларускіх кампазітараў". Цікавасць да фестывалю традыцыйна праяўляюць не толькі таленавітыя выканаўцы Гродзенскай вобласці. Яго гасцямі і ўдзельнікамі былі юныя музыканты Віцебскай, Гомельскай, Брэсцкай, Мінскай абласцей і сталіцы Беларусі. За час існавання конкурсу ў творчых спаборніцтвах прынялі ўдзел звыш 500 юных талентаў з розных рэгіёнаў нашай краіны. У складзе журы будуць прадстаўлены вядучыя педагагічныя работнікі ўстаноў адукацыі ў сферы культуры, дзеячы культуры і мастацтва. Для многіх удзельнікаў "Вясёлка надзей" стала стартавай пляцоўкай для далейшых выступленняў у рэспубліканскіх конкурсах і фестывалях.-0-