Дні адкрытых дзвярэй, прэзентацыі. Якія мерапрыемствы пройдуць у час акцыі "Вандруй! Адчуй! Натхняйся!"

Да акцыі "Вандруй! Адчуй! Натхняйся!", якая пройдзе ў Беларусі 2-8 чэрвеня, далучацца больш за 1 тыс. турыстычных аб'ектаў ва ўсіх абласцях Беларусі, паведаміла на прэс-канферэнцыі намеснік дырэктара Дэпартамента па турызме Міністэрства спорту і турызму Рэспублікі Беларусь Кацярына Ганчаронак, перадае карэспандэнт БЕЛТА . Удзельнікамі стануць аграэкасядзібы, установы культуры, адукацыі, аб'екты харчавання і пражывання, санаторна-курортныя ўстановы, турыстычныя комплексы, экалагічныя паркі, заказнікі, мастацкія і карцінныя галерэі, вытворчыя прадпрыемствы, спартыўныя ўстановы і інш. Пройдуць дні адкрытых дзвярэй, майстар-класы, дэгустацыі страў нацыянальнай кухні, прэзентацыі паслуг, новых пешаходных, веласіпедных маршрутаў, напрамкаў дзейнасці. "Акцыя штогод становіцца ўсё больш папулярнай. Калі ў 2022 годзе мы пачыналі з 516 заявак, то ў 2024-м іх колькасць перавысіла 1,2 тыс. За 1,5 тыдня да пачатку акцыі маем 858 заявак і плануем наблізіцца да 1,2-1,3 тыс.", - расказала Кацярына Ганчаронак. Лідзіруюць па колькасці заявак традыцыйна аб'екты гісторыка-культурнага турызму (ад іх паступіла 247 заявак). Актыўна падключаюцца здраўніцы, медыцынскія цэнтры. Зацікаўленасць праяўляюць установы адукацыі, якія прэзентуюць школьныя музеі, а таксама прыродаахоўныя ўстановы, паляўнічыя гаспадаркі, аб'екты прамысловага, рэлігійнага турызму. Заяўкі прымаюцца да 26 мая, а праз некалькі дзён у агульным доступе будзе размешчаны пералік лакацый, дзе чакаюць турыстаў. Можна будзе забраніраваць экскурсіі, запланаваць наведванні. Арганізатарамі акцыі выступаюць Міністэрства спорту і турызму і Нацыянальнае агенцтва па турызме. Гэта магчымасць адкрыць для сябе нязведаныя куткі роднай краіны, натхніцца яе прыгажосцю і раздзяліць гэтыя эмоцыі з іншымі.-0-