Каля 150 бібліятэк прымуць удзел у рэспубліканскай культурна-асветнай акцыі "Бібліяноч-2026" 24 красавіка. Аб гэтым журналістам расказала намеснік генеральнага дырэктара - дырэктар па ідэалогіі, сацыякультурнай і выдавецкай дзейнасці Нацыянальнай бібліятэкі Беларусі Людміла Высоцкая, перадае карэспандэнт БЕЛТА.
"У гэтым годзе акцыя прысвечана некалькім галоўным тэмам. Безумоўна, мы не абыдзем Год беларускай жанчыны, таксама закранём тэмы 40-годдзя аварыі на Чарнобыльскай атамнай электрастанцыі і 65-годдзя першага палёту Гагарына ў космас. У гэтым годзе ў акцыі будуць прымаць удзел 149 бібліятэк з усёй рэспублікі", - адзначыла Людміла Высоцкая. Паводле яе слоў, у Мінску акцыя пройдзе ў 8 бібліятэках, у Мінскай вобласці - у 23 бібліятэках, у Брэсцкай вобласці - у 22, у Віцебскай - у 25, у Гомельскай - у 23, у Гродзенскай - у 19, а ў Магілёўскай вобласці - у 29 бібліятэках. Нацыянальная бібліятэка Беларусі па традыцыі выступіць куратарам акцыі.
"Наша "Бібліяноч-2026" стане асаблівай падзеяй, таму што мы ў гэтым годзе адзначаем 20-годдзе будынка Нацыянальнай бібліятэкі Беларусі, якая расчыніла дзверы для чытачоў 16 чэрвеня 2006 года. Тэма акцыі "Бібліятэка - гэта прастора сэнсаў", - дадала Людміла Высоцкая.
Яна падкрэсліла, што ў галоўнай бібліятэцы Мінска разгорнуцца дзясяткі тэматычных пляцовак. Стартуе акцыя ў 19.00 з урачыстага тэатралізаванага адкрыцця. Аматараў інтэлектуальных гульняў чакаюць шахматна-шашачныя турніры, майстар-класы па японскіх і кітайскіх шахматах, гульня "Мафія". Для тых, хто шукае новыя веды, пройдуць лекцыі, сустрэчы, выступленні адвакатаў, экспертаў па фэн-шуй. На літаратурнай кухні пачынаючыя аўтары даведаюцца, як трапіць у выдавецтва ў гэтым годзе і аб чым мараць сучасныя жанчыны. Гасцей таксама чакаюць выставы, друкарскія майстэрні, выступленні музыкантаў, інтэрактыўная праграма, вечар бардаўскай песні, інавацыйная 3D-фотазона, прэзентацыя настольнай гульні "Беларуская манаполія", інтэрактыў ад БРСМ.
На пляцоўцы "Жаночая прастора" адбудуцца паказы модных калекцый, майстар-класы і кансультацыі астролагаў, прэзентацыя кнігі тэлевядучай Кацярыны Цішкевіч "50 адценняў голасу" для тых, хто хоча стаць дыктарамі, зразумець, як працуе голас, і навучыцца ім кіраваць.
"Скрыпка, фартэпіяна, вакал, народныя матывы, дыджэй-сэт - музычная праграма "Бібліяночы" здзівіць нават самых дасведчаных меламанаў. У нас будуць вельмі цікавыя бонусныя пляцоўкі. На 23-м паверсе на адкрытай агляднай пляцоўцы пры ўмове добрага надвор'я можна будзе праз тэлескоп паназіраць за зорным небам пад выступленне скрыпачкі", - падагульніла Людміла Высоцкая.-0-